Ôpolszczyzna - co to je, kaj to je i czy w ogōle istnieje?
Ôpolszczyzna to je sztuczny twōr, kiery leży na placach wojewōdztwa ôpolskiygo. Wiynkszość ziymie Ôpolszczyzny to je Gōrny Ślōnsk, zachodnie ziymie to je historycznie Dolny Ślōnsk a na pōłnocy mōmy jeszcze kōnsek Ziymie Wieluńskij. Czyli stwierdzynia Ślōnsk Ôpolski tyż niy powinno sie używać, bo przeca Ziymia Wieluńsko to już niy ma Ślōnsk. Miano Ôpolszczyzna wymyśliły polskie historyki we lotach 20. XX stolecio. Wtedy Oppeln i zachodnio tajla Gōrnego Ślōnska ôstōła we Niymcach a wschodnio ôstôła prziłōnczōno do Polski.
Coby niy godać na te teryny ,,niymiecki Gōrny Ślōnsk'' to Poloki zaczynli godać Ôpolszczyzna i tak ôstōło do dzisioj. Wszyndzie we mediach, gazetach, ôd ludzi idzie usłyszeć hasło Ôpolszczyzna, tak sie przyjynło. Ôkozuje sie, że naszo stolica Opole (Oppeln) niy leży już na Ślōnsku ino na jakijś Ôpolszczyźnie. Podug wielu ludzi Ślōnsk to je ino tam, kaj je wojewōdztwo ślōnskie, a wojewōdztwo te składo sie ino w połowie ze Ślōnska, bo w jego skład włażōm tyż takie miasta jak Częstochowa, Sosnowiec, Jaworzno, Żywiec. A wiynkszość ziymie Gōrnego Ślōnska leży we wojewōdztwie ôpolskim. Polskie wojewōdztwa fest mylōm a ich granice niy majōm nic spōlnego ze granicami historycznymi. Skuli tego to my Ślōnzoki muszymy edukować goroli jako je prowda, bo my ta prowda znomy. Niykierzy używajōm miano Ôpolszczyzna, skuli niywiedzy, bo zowdy sie tak godało to ôni tyż te felerne miano powiylajōm. Tych jeszcze idzie zrozumieć. Ale sōm tacy, kierzy tak godajōm, coby nerwować Ślōnzokōw, chocioż dobrze wiydzōm jako je prowda. Bo czy po przejychaniu przez granica woj. ślōnskiygo i ôpolskiygo idzie ujrzeć jakieś wielkie zmiany? Niy, bo to je to samo ino ftoś to podzielił na pōł. Jedyne co sie może zmiynić to ewentualnie droga we woj. ôpolskim może być gorszo. Woj. ôpolskie jest po zadku we porōwnaniu do ślōnskiygo. Piniōndze idōm na Ôpole i tam jest fajniście, miasto sie rozwijo, turysty przijeżdżajōm. Ale jak sie pojedzie kaj indziej to już niy ma tak dobrze. We lotach 90. fto mōgł to wyjechōł do Rajchu, bestuż liczba ludności wojewōdztwa fest sie zmniyjszyła a niykiere wsie sōm terozki opustoszałe. Chałpy zniszczōne, ôpuszczōne, nadowajōm sie ino do zbulynio. Ludzie pojechali i już niy wrōcōm, bo tu niy ma po co wracać. Ślōnsk umiyro na naszych ôczach. Wiadomo, że jak wszyndzie, wojewōdztwo ôpolskie tyż idzie do przodku. Ale rōżnice dalyj widać. Czasami przikro sie na to zaglōndo.
Pamiyntejcie niy ma czegoś takiygo jak Ôpolszczyzna jest ino Gōrny Ślōnsk.